Ուաշինկթընի Ու Մոսկուայի Շահերը Հասարակաց Են` Սուրիոյ Եւ Տարածաշրջանի Կայունութեան Պահպանման Հարցերուն Մէջ» Ըսաւ Քերրի

Միացեալ Նահանգներու արտաքին գործոց նախարար Ճոն Քերրի երէկ այցելեց Մոսկուա, ուր հանդիպում ունեցաւ Ռուսիոյ նախագահ Վլատիմիր Փութինի հետ: «ՌԻԱ Նովոսթի»-ն հաղորդեց, որ Քերրի հանդիպումին ընթացքին Փութինի հետ շնորհակալութիւն յայտնած է Ռուսիոյ` Պոսթոնի ահաբեկչութեան հետաքննութեան ընթացքին ցուցաբերուած համագործակցութեան համար:
Քերրի նաեւ հաւաստած է, որ Ուաշինկթըն կը կիսէ Մոսկուայի մօտեցումները Սուրիոյ մէջ իրավիճակի լուծման ուղղութեամբ: Ան նշած է, թէ Օպամա «անհամբեր կը սպասէ» Փութինի հետ Իրլանտայի մէջ «Մեծ ութնեակ»-ի վեհաժողովի ծիրին մէջ հանդիպելու հնարաւորութեան:
«Ռոյթըրզ» իր կարգին հաղորդեց, որ Քերրի Փութինի յայտնած է, որ Ուաշինկթընի ու Մոսկուայի շահերը հասարակաց են` Սուրիոյ հարցով եւ տարածաշրջանի կայունութեան պահպանման առումով:
Քերրի հանդիպում ունեցաւ նաեւ իր ռուս պաշտօնակիցին Սերկէյ Լաւրովի հետ, եւ երկու կողմերը համաձայնեցան Սուրիոյ շուրջ միջազգային ժողով գումարելու: Լաւրով հաստատեց, որ տագնապին երկու կողմերուն վրայ պէտք է ճնշում բանեցնենք, որպէսզի բանակցութեանց սեղան նստին: Ան ընդդիմութիւնը «ծայրայեղականներու խմբակ» կոչեց, իսկ Քերրի յայտնեց, որ գնդակը ներկայիս կը գտնուի Սուրիոյ վարչակարգին դաշտին մէջ, որ պէտք չէ քիմիական զէնք օգտագործէ: Ան զգուշացուց Սուրիոյ մէջ համատարած քաոսէ եւ ցեղային մաքրագործումէ, եթէ տագնապին լուծում գտնելու չշտապուի: Քերրի ըսաւ, որ Սուրիոյ մէջ քաղաքական լուծման այլընտրանքը կրնայ երկրին քայքայումը ըլլալ:
Իրանի արտաքին գործոց նախարար Ալի Աքպար Սալեհի յորդանանցի իր պաշտօնակից Նասեր Ժաուտաթի հետ Ամմանի մէջ միացեալ մամլոյ ասուլիսի մը ընթացքին յայտարարեց, որ ինք «յորդանանցի եղբայրներուն հետ» պաղեստինի եւ Սուրիոյ հարցով անկեղծ կերպով խօսած է ու հաստատած, որ Սուրիոյ տագնապը պէտք է լուծուի խաղաղ կերպով եւ սուրիացիներուն կողմէ` նշելով, որ «Իրան կը մերժէ դուրսէն եկող որեւէ լուծում եւ Սուրիոյ մէջ որեւէ արտաքին միջամտութիւն»:
Ան զգուշացուց «Սուրիոյ մէջ որեւէ բացէ, որուն հետեւանքները ժխտական պիտի ըլլան բոլոր պետութեանց համար, եւ արաբ եղբայրները պէտք է այս տագնապին մէջ Սուրիոյ կողքին կանգնին` ընդդէմ իսրայէլեան վերջին յարձակումին». ան մատնանշեց «Ժապհաթ Նուսրայի Սուրիոյ մէջ գործած ջարդերու եւ իսրայէլեան յարձակումներուն ժամանակագրական համընկնումը»:
Ժաուտաթ իր կարգին յայտնեց, որ «Յորդանան այլ պետութեան հարցերուն միջամտութեան դէմ է» եւ յոյս յայտնեց, որ` «Սուրիոյ տագնապին լուծման մաս կը կազմենք եւ Արաբական լիկային հետ կ՛աշխատինք ու մեր կեցուածքները Իրանի եւ այլ պետութեանց հետ կը համակարգենք»: